Campìa

Come ‘n gabian chi sta sorve a ‘na roca

e i fissa ‘r màe turchin sòto àa vazia,

cossì a te vedo, magica Campìa,

sentinèla de ‘r màe,

rampinà come ‘n farco ‘nsima a ‘r monte

te vedi nàsse ‘o so… Boschi de pin

i te circondo come ‘n beo giardin

profumà de sàin.

Passando sòto àa Punta d’o Pitòn

Me a vegnìvo da fante con me pàe:

quando da Derbi la spuntava ‘r màe

a restavo ‘cantà,

a vedevo ’e te dòne forti e s-cete

venìe da ‘e ciàne con ‘e corbe ‘n testa

co ‘i mandili a colòi, come a ‘na festa,

con ‘e fàce ‘ndoà,

a Tramonti a vedevo i pescadòi

co ’ e nàsse ch’ièo ‘na musica d’argento,

‘e vigne càrghe d’òo bazà da’r vento,

come antichi tesòi….

E te lassù, afacià come a ‘n barcòn,

sòto l’urtimo so de quel ‘Agosto

te profumavi ‘nzà de ’r primo mòsto

fran’odoe de maesin...

Ent’e noti de nèbia, quand’er màe

i s-cianta i scògi e i lampi i se scadeno

a vedo ‘o te profilo saraceno

contro ‘o cielo de ciòngio,

ma quando la ritorna Primavèa

‘e prime rondanine a ‘r vecio nido

i te saluto alègre con en grido

cèn de felissità,

e alòa da ‘o largo ‘ e barche ch’i bordezo

i se fermo a mìate, e ‘nfina ‘r vento

i te canta ridendo en complimento

come a ‘na vecia amiga,

poi la passa ‘n vapore tuto gìanco,

en covèrta gh’è gente che la mìa:

l’è l’urtima visìon ch’i pòrta via,

a vision de Campìa!.

TINO BARSOTTI

Settembre 1979